1 Corinto 1

1 Si Pablo, isang ¹tinawag na apostol ni Kristo Hesus sa pamamagitan ng ²kalooban ng Diyos, at si ³Sostenes na kapatid,

2 Sa ¹ekklesia ng Diyos na ²nasa Corinto, samakatuwid ay ³sa mga ⁴pinaging-banal ⁵kay Kristo Hesus, na ⁶tinawag na mga banal, ⁷kasama ang lahat ng mga ⁸nagsisitawag sa bawa’t dako sa pangalan ng ating Panginoong Hesu-Kristo, na ⁹kanila at atin:

3 Sumainyo nawa ang biyaya at kapayapaang mula sa Diyos na ating Ama at sa Panginoong Hesu-Kristo.

4 Nagpapasalamat akong lagi sa Diyos tungkol sa inyo ¹dahil sa biyaya ng Diyos na ipinagkaloob sa inyo sa loob ni Kristo Hesus,

5 Na kayo ay pinayaman sa Kanya sa lahat ng mga bagay, sa lahat ng ¹pananalita at sa lahat ng kaalaman,

6 Gaya nang pinagtibay ¹sa inyo ang ²patotoo ni Kristo,

7 Anupa’t kayo ay hindi nagkulang sa anumang ¹kaloob, na nagsisipaghintay ng ²paghahayag ng ating Panginoong Hesu-Kristo,

8 Na ¹Siya namang ²magpapatibay sa inyo hanggang sa katapusan, upang huwag kayong mapag-wikaan sa ³kaarawan ng ating Panginoong Hesu-Kristo.

9 Ang ¹Diyos ay tapat, na sa pamamagitan Niya ay tinawag kayo sa ²pakikisalamuha sa Kanyang Anak na si Hesu-Kristo na Panginoon natin.

10 Ngayon ay ipinamamanhik ko sa inyo, mga kapatid, sa pamamagitan ng ¹pangalan ng ating Panginoong Hesu-Kristo, na kayong lahat ay ²mangagsalita ng isa lamang bagay, at huwag mangagkaroon sa inyo ng mga ³pagkakabaha-bahagi, kundi kayo ay ⁴mangagkatugma sa isa lamang kaisipan at isa lamang ⁵kuru-kuro.

11 Sapagka’t ipinatalastas sa akin tungkol sa inyo, mga kapatid ko, ng mga kasambahay ni Cloe, na sa inyo ay may mga pagtatalu-talo.

12 Ibig ko ngang sabihin ito, na ang bawa’t isa sa inyo ay nagsasabi, ¹Ako ay kay Pablo, at ako ay kay Apolos, at ako ay kay Cefas, at ²ako ay kay Kristo.

13 Nababahagi ba si ¹Kristo? ²Ipinako ba sa krus si Pablo dahil sa inyo? O binautismuhan ba kayo tungo sa pangalan ni Pablo?

14 Nagpapasalamat ako sa Diyos na hindi ko binautismuhan ang sinuman sa inyo maliban kina Crispo at Gayo,

15 Upang walang makapagsabi na kayo ay binautismuhan tungo sa loob ng aking pangalan.

16 At binautismuhan ko rin naman ang sambahayan ni Estefanas; maliban sa kanila, hindi ko alam kung may nabautismuhan pa akong iba.

17 Sapagka’t hindi ako ¹isinugo ni Kristo upang magbautismo, kundi upang magpahayag ng ebanghelyo, hindi sa ²pananalitang batay sa karunungan, upang ang ³krus ni Kristo ay hindi mawalan ng kabuluhan.

18 Sapagka’t ang ¹salita ng krus sa kanila na nangapapahamak ay kamangmangan, nguni’t sa atin na nangaliligtas ito ay kapangyarihan ng Diyos.

19 Sapagka’t nasusulat, Sisirain Ko ang karunungan ng marurunong, at gagawin Kong walang kabuluhan ang pagkaunawa ng ¹may-maingat-na katalinuhan.

20 Saan naroroon ang marunong? Saan naroroon ang ¹eskriba? Saan naroroon ang debatista ng kapanahunang ito? Hindi ba ginawa ng Diyos na kamangmangan ang karunungan ng sanlibutan?

21 Sapagka’t yamang, sa karunungan ng Diyos, hindi nakilala ng sanlibutan ang Diyos sa pamamagitan ng Kanyang karunungan, ¹kinalugdan ng Diyos na iligtas ang mga nagsisipanampalataya sa pamamagitan ng kamangmangan ng ²pagpapahayag.

22 Yamang ang mga Hudyo nga ay nagsisihingi ng mga ¹tanda, at ang mga Griyego ay nagsisihanap ng ¹karunungan,

23 Datapuwa’t ang aming ipinapahayag ay ang Kristo na ¹naipako-sa-krus, na sa mga Hudyo ay katitisuran, at sa mga Hentil ay kamangmangan,

24 Nguni’t sa ¹kanila na mga tinawag, maging mga Hudyo at mga Griyego, si Kristo ang ²kapangyarihan ng Diyos at ang karunungan ng Diyos.

25 Sapagka’t ang kamangmangan ng Diyos ay higit na marunong kaysa sa mga tao, at ang kahinaan ng Diyos ay higit na malakas kaysa sa mga tao.

26 Sapagka’t masdan ninyo ang inyong pagkatawag, mga kapatid, na hindi ang maraming marurunong ayon sa laman, hindi ang maraming makapangyarihan, hindi ang maraming ¹mahal na tao ang mga tinawag.

27 Kundi ¹pinili ng Diyos ang mga mangmang ng sanlibutan upang hiyain Niya ang marurunong, at pinili ng Diyos ang mahihina ng sanlibutan upang hiyain Niya ang malalakas,

28 At ang ¹mabababang tao ng sanlibutan at ang mga ²hamak ang pinili ng Diyos, ang mga ³bagay na ⁴walang halaga, upang Kanyang ⁵maiuwi sa wala ang mga ⁶bagay na mahahalaga,

29 ¹Upang ang lahat ng sa laman ay hindi makapagmapuri sa harapan ng Diyos.

30 ¹Datapuwa’ t sa ²Kanya kayo ay nangasa kay Kristo Hesus, na sa atin ay naging karunungang mula sa Diyos: ³katuwiran at pagpapabanal at katubusan;

31 Na ayon sa nasusulat, Ang nagmamapuri ay hayaang magmapuri sa Panginoon.